حكاية قصيرة من حكايات زمان ياقاتل الروح وين تروح
.jpg "حكاية قصيرة من حكايات زمان ياقاتل الروح وين تروح")
في زمان بعيد كان واحد حطاب فقير عايش هو ومريتو في حوش قديم في قرية بعيدة دايرة بيها غابة من كل النواحي . ماعندهمش لقمة يومهم وحتى الاولاد ربي مارزقهمش ، وكان الحال حال شتاء و صقع ومطر يالطيف ، وفي عشيّة من العشيات... الصقع صميقري والحوش تاعهم ڨديم تضرب فيه الريح قريب يطيح عليهم وهوما يرعشو يا كبدي من ذاك الصقع ولا عندهم غطى ولا حوايج يدفوهم... غير حطيبات يشعلو بيهم النار باش يدفو شوية ويجيهم النوم... وفي يوم من الايام جاو باش يشعلو ذيك النار ..ضربو عالحطيبات لقاوهم كملو ومالقاوش باش يدفو .
.قالت المرا لراجلها : يا راجل أخطف رجلك برا وروح للغابة حوسلنا على شوية احطب قبل ما ايليّل الليل.. .معندناش باش ندفو الليلة ، قاللها مديلي الفاس من حذاك... مدتهولو . حطو على كتفو وطلع للغابة باش يحطب...
امشى مشى حتى سيقانو طابو والغابة ما فيها شي كل الشجيرات مشمخين وعريفاتهم خضر ماينفعوش يحطبوهم ولا تشعل فيهم النار... والريح يصرفق على اليمين وعلى اليسار، وأصوات الشجر يحرك فيها الريح المهم نهار الله لا يشوفكم فيه . .. وهوا ماشي ويتلفت هنا وهنا ويشوف من بعيد في دالية عنب طالعة بين الشجر سبحان الخالق ، دالية في عز الشتاء و فيها عنيقيد يدلدل عنب يحل العين المغمضة شهيتكم فالجنة
.. امشى لذيك الدالية وهوا مستغرب كيفاش شجرة كي هاذي نابتة ووالدة في هالصقع والمطر.
.. امشى لذيك الدالية وهوا مستغرب كيفاش شجرة كي هاذي نابتة ووالدة في هالصقع والمطر. قال هذا اكيد رزق باعثهولي ربي ومكان حتى شيء علي ربي بعيد ..
واحنا عارفنا جيعانين ماعندنا مانتعشو ،، يمشي يقطع ذاك العنقود ويحطّو في سعيفة وقصد طريق الحوش مروح
قال: هذا نروّح بيه للمرا تفرح بيه ،، وهو مروح في طريقو لقى شوية حطيبات قال يشدوني الليلة وغدوة يحلها ربي ... حط ذوك الحطيبات فوق ظهرو وكمل طريقو حتى لحق...
عيط على المرا يامرا ارواحي تشوفي واش لقيت؟ يامرا ارواحي تشوفي واش لقيت؟
عنقود عنب في عِز فصل الشتاء، قاتلو سبحان ربي واش يخلق ، قلها هيا اغسليه وجيبيهولنا الليلة لقينا باش نتعشو .....خممت شوية مريتو وقاتلو تعرف كيفاش ياراجل واش رايك تهزو هدية للسلطان و يكافيك بشوية دريهمات نصرفوهم في هالشتاء ونلقو ماناكلو..
ياقاتل الروح وين تروح الجزء 2
قاللها : ايه عندك الحق والله فكرة هايلة .ومن حينو طلع يجري من حوشو قاصد قصر السلطان وهو فرحان ومعاه ذاك العنقود تاع العنب في فالسعيفة واول ماوصل باب القصر ، لقى الحرّاس... سولوه : خير اتفضل واش تحب ؟ تفضل جاي تشكي والا تهدي ؟ قاللهم : عندي هدية لمولانا السلطان ، اعطاوه الاذن ودخل للسلطان قال : يا سيدي السلطان اليوم طلعت للغابة نجمع في شوية احطب من الغابة ونلقى ياسيدي شجرة عنب من غير فصل ، و لقيت فيها ذالعنقود نتاع العنب و قلت مولانا السلطان يستحق الهدية ومد السعيفة بعنقودها للسلطان . السلطان دخل إيدو فالسعفة..قال وشي هذا؟ يا لطيف اللطف... ملقاشي عنب ، قالو: متأكد هذا عنب ؟ قال الراجل : ايه يا مولاي السلطان قطعتو بأيدي ، قال السلطان : يا راجل بالاك و انت جاي كاش واحد بدلك السعفة ؟ قال الراجل : لا ياسيدي من وقت قطعت عنقود العنب وهو معايا في فالسعفة في إيدي مابدلهولي حد...
.قالو السلطان : مدام هكّذا قرّب شد السعفة وخرج انت عنقود العنب ! .. الحطاب شد ذيك السعفةو دخل إيدو وحار وشي هذا؟؟؟ ياويلي ، خاف ووجو بدى يصفاّر ويخضاّر و طلّع ايدو ويلقاه راس ولد صغير ياحنا مقطوع والدم يتسايل
وبدى ذاك الحطاب يرعش.. يعيّط اه وشنهي هذا منين جاني !! اتخلخل مالفجعة وتبدّل وجهو تقول جبدوه من قبر، قال للسلطان ياسيدي والله جبتو عنقود عنب وين راح ياويلي وشنهي ذالمصيبة لي طاحت عليا؟ مش عارف يا سيدي اشكون حطلي الراس ؟
السلطان قالو : مش قلت السعفة في ايدك ما مسها حد قول الحق يا راجل خير ما نقطعلك راسك.. .
وذاك الراجل يحلف ويعيط والله ما نعرف ياسيدي ، والله ما نعرف كيفاش جاء والله كان عنقود عنب، والله يا سيدي السلطان ......
ياقاتل الروح وين تروح. الجزء 3
وصلنا في حكايتنا انو الحطاب يحلف و يتحلف والله ما نعرف ، والله ما نعرف ، كيفاش جاء.. منين جاتني دالمصيبة والله الا كان عنقود عنب، والله يا سيدي السلطان .
عيط السلطان للحرّاس نتاوعو .. شدو الحطاب و بداو فيه ضرب.... قول للسلطان واش صار والرأس هذا تاع شكون؟ والحطاب في كلمة وحدة ياسيدي مانعرفوش ياسيدي مانعرفوش حتى داخ من الضرب طاح مغمي ....وكل مايغمى عليه يينوضوه ويصبو عليه الماء ويقولو السلطان مازالت مش حاب تقولنا مازالت تحبنا نضربوك ؟؟ وعاودوا يضربو فيه وخبطوه عذبوه عذاب كحل وبعدين حطوه في الحبس،فات النهار الاول ..والثاني... و. و. و. نفس الشي يضربو فيه حتى يغمى عليه وبعد يلوحوه في الحبس وفي يوم قالو السلطان : أرحم روحك وقوللنا الحقيقة راهو بعد الضرب قطع الراس ...
قالو : أعطيني مهلة انفكّر واللهط اللي نعرفو اني قطعت عنقود عنب وجيتك بيه ياسيدي... قالو السلطان : عندك مهلة نصف نهار وبعدين وجد راسك للقص يخوف فيه باش يهدر ..
وبعثو للحبس ومعاه رأس الوليد لي لڨاه فالسعفة ومعاه زوج حراس .. والراجل في الحبس كل مرة يخرج ذاك الراس المقصوص يشوفو ويثبت فيه مليح ويرجعو في فالسعفة ويقول زعمة هو؟؟؟ زعمة هو؟؟؟ لكن كيفاش جاء لسعفتي!!! وبعدين مسح الدم الي عليه وناض يعييط بصوت عااااالي ويقول هو !! هو!! والله غير هو ويعيط وخايف مرة يعيط ومرة يسكت كي المهبول و يثبت فيه.. يا ربي هو . ايه عرفتو شكون.... لكن ماحبش ايقول ...
تحمّل اسبوع على هذاك لحال والحراس يضربو فيه وهو محبش يهدر حتى خلاص ولى ميتحملش الضرب والعذاب وقال الموت اريحلي وارحم من العذاب الي راني فيه وقاللهم خلاص ...هزوني عند السلطان وانا نقول كل شي.... هزوه.. للسلطان... .. قالو السلطان يلا أحكي ..
قالو : يا سيدي السلطان أنا مش كذاب وقصة العنب واللي قلتو كلو صحيح لكن انا نعرف الراس هذا نتاعمن . ونعرف شكون ذبحو ... واهو جايكم في الحديث...
الجزء 4 ونعرف شكون ذبحو .
واهو جايكم في الحديث.
انا كان عندي قطعة أرض صغيرة كل عام نزرع فيها شوية قمح و شعير .. وعندي جاري عندو أرض لاصقة في أرضي تعاركت انا ويّاه على امتار تاع الارض هو يقول ليا وانا نقولو ليا...ليا ليك ،، ليا ليك ومشينا للقاضي ..وكل واحد جاب وراقو وشهودو ...وفي الآخر حكم القاضي لجاري وداهم هو مني وانا من ذاك اليوم وانا حاقد عليه وحامل غيضي في قلبي ليل ونهار و نستنالو في فرصة باش ننتقم منو وفي يوم من الايام و أنا ماشي وسط الغابة لقيت ولد جاري يلعب وحدو ، طفل صغير... ، قلت هاذي الفرصة باش نأخذ بثأري ونحرقلو قلبو كيما دا مني أرضي وحرقلي قلبي و شديت الولد و قتلو راح نقتلك ،
قالي الولد : " والله الا ما نشكي بيك "
قتلو : أنا راح نقتلك فالحين و ندفنك في ذلغابة وشكون راح يسمع بيك ؟؟.. ما كان حتى حد غيري انا وياك ... والله حتى الملك ماهو عارف بيك.....
رد عليا :
" أنا نشكيك للملك الكبير و الملك الكبير يخلي الملك الصغير يأخذلي حقي منك " ..
و لكن أنا ما فهمتش كلامو في ذاك الوقت وقتلتو وحفرتلو و دفنتو وسط الغابة و من غير ما نعرف بعد سنين في نفس البلاصة اللي دفنت فيها الوليد طلعت شجرة العنب و أنا هذا وين تفكرت ودار الزمان وخدالو ربي حقو مني . ..وبدا يبكي ويعيط....طرطق بالبكى ناض السلطان عيط للحراس وقالهم : " قصولو راسو " ربي ياخد حق المظلوم ولو بعد حين...
ان شاءالله تكون عجبتكم لحكاية...
.jpg&description=حكاية قصيرة من حكايات زمان ياقاتل الروح وين تروح في زمان بعيد كان واحد حطاب فقير عايش هو ومريتو في حوش قديم في قرية بعيدة دايرة بيها غاب…){kind=link}
تعليقات
إرسال تعليق