قصة وعبرة سامحيني يا أمي ١٧ سنه فاتوا على وفاة والدي
.jpg "قصة وعبرة سامحيني يا أمي")
كنت وقتها عندي ١٣ سنة ..انا كنت أكبر اخواتي ..مصطفى وريم تؤام اصغر مني ب ٥ سنين
وفاة والدي كانت صدمة قاسية علينا .. أمي قررت تكون لينا هي الأم والاب في وقت واحد
بعد انتهاء شهور العدة ..عمي الوحيد قرر يتقدم لامي علشان يتجوزها .. أمي رفضت وقالت مش ممكن حد ياخد مكان جوزي وابو ولادي ..انا مش عايزه جواز ، عايزة بس اربي عيالي .. كنا وقتها ساكتين في بيت عيلة ..شقة عمي تحت مننا ..من وقت ما أمي رفضته وهو أخد الموضوع على كرامته اوي وحس بأهانه..خصوصا وأنه مقتدر
وظروفه المادية تسمحله يفتح بدل البيت اربعه
مكنش متوقع رد فعل أمي ، خصوصا وان والدي كان موظف بسيط ومعاشه كان صغير يادوب يكفينا لنص الشهر
دا أن كفى كمان .. واهل امي ظروفهم على أدهم
ومش هيقدروا يساعدوها
كل الظروف دي خلت عمي حسان متخيل أن عرضه الجواز على أمي هو فرصه بالنسبة لها متتعوضش .
ولكن هو متوقعش رفضها ابدا .. من يومها ومراته حست
بأن وجود امي خطر عليها في البيت ..وقررت تطفشها
عشان جوزها ميتجوزش عليها
بقت بتفتعل المشاكل مع أمي كل يوم ..وللاسف محدش كان بيدخل ويقف مع أمي ..الجميع
كان بييجي عليها
ويصدق مرات عمي لأنها كانت ست صعبة في المعاملة
وأهلها ناس بتوع مشاكل
حاولت أمي تفهمها أن مسألة جوازها من عمي دا كان عرض منه هو ..وهي رافضة ولا يمكن تتجوزه هو او غيره
لكن مفيش فايدة مكنتش مقتنعه .. هددتها بشكل مباشر انها لو مسابتش البيت هتاذي حد مننا
أمي خافت وقالت لعمي اللي أستغل الموقف وقالها لو اتجوزته هحميكي ومحدش هيقدر يتعرضلك لا انتي ولا اولادك ..وبعد معاناه ومشاكل مبتخلصش ..قررت أني تسيب البيت
اتنقلنا من بيتنا وروحنا في شقة اوضة وصالة
إيجارها وقتها اخد نص المعاش ..وبقت ظروفنا صعبه
اكتر ..
كنت بسمع امي كل ليلة وهي بتعيط على الكنبه برة
وانا نايم جنب أخواتي في الأوضة
كنت بتقطع عشانها ..
خرجت في ليلة وهي بتعيط سألتها
_مالك يا ماما بتعيطي ليه ؟
حاولت تخبي دموعها ومسحتها بكف إيدها بسرعه
وقالت
_مفيش يا حسام ..انا كويسه يا حبيبي
انت ايه اللي صحاك من النوم بس
انت مش عندك مدرسة الصبح
_بصراحه يا ماما انا مش عايز اروح المدرسة دي تاني
ضربت بأيدها على صدرها وقالت
_ليه بتقول كدا يا حبيبي ..حد ضايقك في المدرسة ؟
_لا يا ماما ..بس أنا شايف أن الحمل زاد عليكي
وبصراحة لازم اشتغل وأساعدك
ظهر الغيب على وشها وقالت
_ايه الهبل اللي انت بتقوله دا يا حسام
انت مش ممكن تسيب المدرسه ابدا
_يا ماما اسمعيني..انا مش صغير وبصراحه كدا
لازم تحسي انك مخلفه راجل ..وأنا لازم اشتغل وأساعدك
عشان اخواتي يكملوا تعليهم
_حسااام ..اوعى اسمعك تقول كدا تاني
لو انت ابني حبيبي ..تسمع كلامي وتنسى موضوع الشغل دا
ربنا كريم وهيدبرها من عنده
قررت انفذ اللي في دماغي وروحت أشتغلت في ورشة تصليح سيارات عند عم عبده الميكانيكي اللي في منطقتنا
وبعد اسبوع وصل جواب انذار من المدرسة بسبب غيابي
ولما امي واجهتني بيه اعترفت اني فعلا مش بروح
واني اشتغلت في الورشة عند عم عبده
امي خدتني من إيدي وراحتله وقالتله
_يرضيك يا اسطى عبده تشغل عيل زي دا عندك
وتمرمطه ويسيب المدرسة بسببك
_طيب ممكن تهدي يا ست ام حسام
_اهدى!!..اهدى أزاي يعني ...
ابوهم يموت وأنا أهمل في تربيتهم ومستقبلهم يضيع ..وتقولي اهدي؟
_صدقيني انا شغلته عندي بعد إلحاح منه ..وهو مفهمني انك عارفه بشغله عندي ..ولما سالته #طب_ومدرستك
قالي انه هياخدها منازل وهيمتنح اخر السنة
بصتلي وقالت
_انت قولتله كدا يا حسام
بصيت للأرض ومجاوبتش
_عموما انا مش عايزك تقلقي انا شايف انه ولد شاطر وبيتعلم بسرعه واهو برضو هيساعد معاكي في مصاريف البيت
_لا يا سيدي متشكرين ..مش محتاجين مساعده من حد
وابني هيكمل علامه ..ذوق عافيه هتكمل يا حسام
سحبتني من ايدي بره الورشة وقالت
_اياك ترجع هنا تاني
_يا ماما انا مش صغير ..ومينفعش تكسفيني كدا قدام المعلم والصنايعية اللي عنده
_طيب يا حسام لينا بيت نتحاسب فيه
رجعنا البيت ولما وصلنا لقينا أختي ريم واقفه قدام
باب الشقة وبتعيط
ماما قالت لها في ايه يا ريم ..رجعتي بدري ليه
وبتعيطي ليه كدا ؟
_ الحقي مصطفى اخويا يا ماما
_ايه الي جراله !! ...
يتبع ...
سامحيني يا أمي الجزء الثاني والاخير
_ الحقي مصطفى اخويا يا ماما
_ايه الي جراله !!
بداخل المستشفى الحكومي كان مصطفى بيصرخ
من الالم وبجواره احد المدرسين
كنت بجري أنا وأمي وريم لما وصلنا للاستقبال وشوفنا
مصطفى نايم على سرير وبيصرخ من الألم وهو بينزف
والدكتور بيخيط رجله
_بس خلاص يا حبيبي خلصنا
_ايه اللي حصل يا دكتور
_جرح في الساق واخد ٧ غرز..
_طب هو بيصرخ ليه ..هو مفيش بنج
_مفيش أزاي ..لا فيه ..بس نسبة قليلة ..
_عيل زي دا هيتحمل ٧ غرز أزاي من غير بنج بس
يا ضنايا يا بني
_ما قولتلك يا ستي في بنج بس نسبة قليلة
الامكانيات هنا ضعيفه ..دي مستشفى حكومي
مش خاصه ... وبعدها كتب له على علاج وراحه تامة
وطبعا مفيش علاج في المستشفى ..لأنها حكومي
_امري لله
شالت امي أخويا على كتفها وطلعنا بيه على أقرب صيدلية
جاب الصيدلي العلاج وأمي بصت في سعر الروشته
وقالت مش معايا إلا ٦٠ جنيه
_ناقص ٥٠ يا مدام..العلاج ب ١١٠
طلعت الباقي من جيبي ومديته للصيدلي
امي بصت وقالت
_جبت الفلوس دي منين يا حسام
_من شغلي يا ماما ..انا كملت اسبوع عند عم عبده
ولسه مقبضني النهارده قبل ما تيجي انتي الورشة
بص لي الصيدلي بأستغراب وهو بياخد الفلوس
وبيديني العلاج
رجعنا البيت وأمي حطت مصطفى في سريرة
وانا نزلت
_رايح على فين
_ربع ساعه وجاي مش هتأخر ..سلام
رجعت من برة وأنا شايل فرخه وأكياس خضار
فيها طماطم وبطاطس
_ايه دا يا حسام ؟
_مصطفى نزف كتير ولازم يتغذى يا ماما
اول مرة من وقت وفاة بابا أشوف نظرة الفرح في عين ماما
خدتني في حضنها وقالت
_انا عارفه انك راجل وان اللي خلف ما ماتش
بس لو انا غالية عندك فعلا ترجع المدرسة
بعد مناقشات كتير رجعت المدرسة وأمي قررت
انها تبيع كشري على عربية في الشارع
اعترضت في الاول وقالت أن دي فترة مؤقته
لحد ما اكبر وأخلص دراسة وأشيل عنها
فعلا ابتدت تجهز للموضوع واشترت العربية وبدات تبيع
الموضوع كان صعب في الاول والناس أستغربت
وكتير أنتقدوها انها ست وميصحش تقف تبيع في الشارع
وكان ردها انها مش بتعمل حاجة عيب ولا حرام
كنا بنساعدها في تجهيز الكشري ..بس ريم كانت مضايقه وحاسه بالكسوف من الموضوع دا ..لكن مع الوقت أبتدت ترضى بالأمر الواقع
عدت سنه واتنين وبقيت في تالتة أعدادي
والامور كانت ماشية تمام ..امي ربنا كرمها وبقى ليها زبون
والناس كلها بتشهد بنضافة الأكل وطعامته
امورنا المادية بقت أحسن والحمدلله ..في يوم بعد المدرسة
كنت واقف مع أمي على عربية الكشري وبساعدها
لقيت فجأة بتوع البلدية هجموا مرة واحده والبياعين
واصحاب الفرش..كله ابتدا يجري ويلم حاجته
جم اتنين وشالوا العربية ورفعوها على عربية نص نقل
والأزاز اتكسر والكشري أدلق على الأرض
فضلت امي تصرخ وتتحسبن فيهم
وتقول أنا بجري على يتامى يا بيه ..حرام عليكم
لكن مفيش فايدة ..شوفت نظرة القهر في عيونها
وهي مكسورة على حلمها ومصدر قوتنا وهو بيدمر
وبيضيع في ثانية
_هنعمل ايه دلوقت يا ماما
_هنروح القسم طبعا عشان نشوف حل للمصيبة دي
قبل الحاجة ما تتصادر
_طيب مش المفروض نشوف محامي الأول
_ايوه عندك حق .. تعالى نروح الأستاذ عاطف المحامي
وهو يقولنا نتصرف أزاي
روحنا للمحامي ..اللي طلع معانا على القسم
وفضلنا هناك لحد الساعه عشرة ..وبعدها خلصنا الموضوع
بعد ما دفعت امي غرامة واتعهدت انها مش هتقف تبيع تاني في المكان دا بدون ترخيص
أمي كانت زعلانه اوي بعد ما خرجنا
من القسم وقفنا قدامه شوية
والمحامي قالها
_مش عايزك تزعلي ..كويس أن الظابط تعاطف معاكي
عشان بتربي في يتامى واقنعته يفرج عن العربية
اهو تبيعيها وتجيبلك قرشين
_انا مش عارفه اعمل ايه. انا شغاله بالحلال
وعايزة اربي ولادي ..انا عمري ما أذيت حد والدنيا كلها جاية عليا
_لا متقوليش كدا ..انا جنبك متقلقيش
حسيت في كلامه ونظراته لامي بطريقة مش مريحه
قولتله
_احنا متشكرين يا متر ..على #تعبك_معانا
_لا مفيش تعب انا معملتش حاجة
ماما قالت له
_ممكن أعرف اتعابك كام
_يا ستي ملوش لزوم..دا مفيش بين الخيرين حساب
_عموما كلها كام يوم اكون اتصرفت ولقيت بيعه للعربية
واجبلك الفلوس
مسك إيدها مره واحده وتظاهر انه بيسلم عليها وقال
مفيش مشكلة الموضوع مش مستاهل احنا مش غرب ولا أيه؟
ساعتها محسيتش بنفسي الا وانا بضربة بحجر فوق دماغه
وقع على الأرض وهو غرقان في دمه ..
أمي بصت لي وهي مش مصدقة اللي حصل !!؛
تم القبض علي على الفور ..واتحجزت في القسم
المحامي دخل المستشفى ..حصله أرتجاج في المخ
وقالوا أن دي جنحه
أتحكم عليا بسنة سجن .. والمحامي تم شطبة من نقابة المحامين بسبب اللي عمله واتحكم عليه بست شهور كمان
طبعا أمي كانت هتموت من القهر عليا .. واضطرت
انها تشتغل خدامه في البيوت عشان تقدر تصرف على اخواتي .. ولما خلصت فترتي وخرجت من الإصلاحية
أشتغلت في ورشة الميكانيكا ..وطلبت من أمي ترتاح في البيت وانا هتكفل بالمصاريف
عدت السنين وتعبت وشقيت واتمرمطت لحد ما بقيت صنايعي وقدرت أساعد امي وأخواتي في المدرسة
بقيت مش مخليهم ناقصهم حاجه من لبس ودروس ومذكرات ..الحمدلله مقصرتش معاهم
بعد الثانوي دخلوا الجامعه مصطفى دخل هندسه
وريم دخلت صيدلة .. كنت فخور جدا بيهم وببقى ماشي وأنا رافع راسي في الحتة ..اني قدرت احافظ على بيتنا بعد موت والدي وأخواتي يكملوا تعليمهم ويدخلوا كليات محترمه
كنت بشوف الفرحة في عيون أمي وهي حاسه أن تعبها
مراحش على الفاضي، بس مع ذلك كنت بحس بحزن جواها مش بتحاول تبينه..حزينة اني مكملتش تعليمي
انا برضو اول فرحتها وكان نفسها تشوفني أحسن من كدا
بس مش مشكلة انا راضي ومبسوط..نجاح اخواتي وتفوقهم هو نجاحي برضو
مرت الايام وقررت اننا نرجع لبيت أبويا من تاني
أمي رفضت وقالت بلاش هما مش بيحبونا
وعمك مش هينسى اني رفضته زمان وواخد الموضوع على كرامته
_دا بيت ابونا الله يرحمه..ومن حقنا وكفاية اللي عملوه معانا زمان وسابونا الأيام تبهدل فينا..بدل ما يقفوا جنبنا
هنرجع بيتنا وراسك مرفوعه وخلي حد بس يفكر يبصلك
او لحد من أخواتي وأنا عامله بأسناني أكل
رجعنا البيت بعد أكتر من ١٥ سنة وكانت أمي فرحانه
جدا لأنها رجعت لبيتها من تاني اللي عاشت فيه أجمل ذكريات مع والدي ..وعمي ومراته وولاده أستغربوا رجوعنا
مرت الايام ومصطفى أتخرج من الكلية وبتقدير عالي ..وأشتغل في شركة كبيرة والحمدلله
وقبل شهور من تخرج ريم كان في زميل ليها في الكلية قرر يتقدم لها ..كانت طايرة من الفرحة واضح انها بتحبه فعلا
بس للأسف الموضوع مكملش
لأنه سأل عننا وصرف نظر
رجعت ريم في يوم زعلانه و بتقول أن علاء خلاص سابها
وانتوا السبب
ماما قالت لها
_احنا السبب في ايه يا ريم؟
_علاء سأل عننا وعرف انك كنتي بتبيعي كشري يا ماما في الشارع
وكمان كنتي ..
_كنت ايه كملي
سكتت ريم ودموعها نزلت
_كنت خدامه في البيوت مش كدا..انتي بستعري من امك يا ريم
اللي ربتك وشقيت عشانك انت واخوكي ..عشان تكملي تعليمك
وتبقي دكتورة وفي الاخر دي تبقى جزاتي
قولتلها
_لا يا ماما ريم أكيد متقصدش
وبعدين يا ريم متزعليش ربنا بكرة يعوضك باللي احسن منه
اللي يحبك انتي لشخصك ويقدر ظروف أهلك ..احنا احسن من غيرنا بكتير بنتعب وبشتغل بشرف لا سرقنا ولا مدينا أيدنا لحد في يوم من الايام
بصت لي وقالت
_حتى لو جه غيره ..ماهي المشكلة لسه موجودة
_مشكلة ايه ؟
_انت كمان سبب كبير في مشاكلي
_أنا يا ريم؟
_علاء بيقولي أن اخوكي رد سجون
الكلمة وجعتني اوي
أمي زعقت في اختي وقالتلها
_انتي بنت قليلة الرباية فعلا
أزاي تقولي كدا عن أخوكي
وضربتها بالقلم
وقالت
_اخوكي دخل السجن عشان كان بيدافع عني ..مدخلش في سرقه ولا نصب ..انتي لازم تبقي فخورة بيه مش تقولي رد سجون
انا عارفه انك من صغرك وانتي نمروده ومش عاجبك حالنا ولا عيشتنا ..وبدل ما تحمدي ربنا
اننا برغم ظروفنا دي خلناكي تكملي تعليمك وتبقي دكتورة
وبعد كل دا جاية تحسابينا
_انتي بتضربيني يا ماما
انتي عمرك ما عملتيها؟
_اضربك واكسر دماغك كمان
لأني للاسف معرفتش أربيكي
_ماشي يا ماما ..طب انا مش قاعدالك في البيت
_غوري في داهية انا اللي مش عايزة اشوفك وشك تاني
أخدت ريم شنطتها وخرجت بسرعه وهي دموعها على خدها
نزلت وراها وانا بقولها استني ياريم
خرجت من البيت بسرعه وانا بقولها ..
_استني بقولك ..هتروحي على فين
بصت وراها وهي بتعدي الشارع
_ملكش دعوه بيا حسام
_خلي بالك ...حاسبي..ريييم
خبطتها عربية واتنقلت للمستشفى ..كانت حالتها صعبة جدا ..واحتاجت نقل دم وبسرعه
للاسف فصيلتها كانت نادرة
لكن لستر ربنا كانت امي نفس فصيلة دمها ..اتبرعت بالدم لريم
رغم تعبها ومرضها..لكن قالت خدوا دمي كله بس بنتي تعيش
فاقت ريم تاني يوم وكنت جنبها انا ومصطفى اللي قالها
_حمدلله على سلامتك يا ريم
خضتينا عليكي
_الله يسلمك..هو ايه اللي حصل
خبطتك عربية وأنتي خارجة من البيت زعلانه بسبب علاء
وحسام جابك المستشفى
_انا اسفه بجد يا حسام
حقك عليا انا مش عارفه قولت كدا أزاي ..
_ملوش لزوم الكلام دلوقت المهم انك قومتي بالسلامه
_طيب وماما هي ليه مجاتش
اكيد زعلانه مني ..بس عندها حق انا أستاهل اكتر من كدا
رد مصطفى وقال
_ماما هنا في المستشفى ..بس في أوضة تانية ..انتي كنتي محتاجه نقل دم..وهي اتبرعتلك
برغم تعبها وتحذير الدكاترة ليها
بس هي صممت تتبرع عشان تنقذك
_طيب ودوني بسرعه ليها
_انتي لسه تعبانه ياريم..مينفعش تتحركي
_بقولك وديني ليها يا مصطفى
ساعدتها انا واخويا تروح لماما
اللي اول ما شافتها فرحت
_حمدلله على سلامتك يا ريم
ايه بس اللي قومك من سريرك
وطت على ايد ماما وباستها
وفضلت تعيط
_انا اسفه يا ماما ..بجد اسفه
انا عمري ما هسامح نفسي ابدا
عن اللي قولته ..حقك عليا
حقك عليا يا حسام ..انا كنت غلطانه فعلا انا مليش غيركم في الدنيا وانا من غيركم ولا حاجة
_متقوليش كدا يا عبيطة انتي مش أختي وبس انا بعتبرك بنتي كمان
_ربنا يخليك ليا يا احلى واجدع اخ في الدنيا..وياريت ماما تسامحني
_مسامحاكي يا ريم ..مفيش ام تقدر تزعل ابدا من ولادها مهما حصل ..انتوا أملي في الدنيا
انا عايشه عشانكم ربنا ميحرمنيش منكم ابدا واشوفكم احسن الناس
تمت
.jpg&description=قصة وعبرة سامحيني يا أمي ١٧ سنه فاتوا على وفاة والدي كنت وقتها عندي ١٣ سنة ..انا كنت أكبر اخواتي ..مصطفى وريم تؤام اصغر مني ب ٥ سنين وف…){kind=link}
تعليقات
إرسال تعليق